Askari wa Wanyamapori Waagizwa Kuishi Katika Mapori ya Hifadhi

Wakati ilipowekwa: March 1st, 2018

Waziri wa Mali ya Asili na Utalii Mhe. Dr. Hamis Kigwangala amewagiza askari wa wanyama pori nchini kuwa na makazi yao na ofisi zao katika mapori ya hifahdi ili kuweza kudhibiti ujangili na uvamizi katika mapori hayo.

Waziri Kigwangala ameyasema hayo ofisini kwa Mkuu wa Wilaya ya Ngara Februari 28, 2018 wakati wa ziara yake wilayani humo kwamba ujangili na uvamizi wa mapori hayo unatokea kwa sababu askali hao wanaishi mjini.

 “Sasa tubadilike tujenge nyumba na ofisi za askali hao katika mapori ya hifadhi ili tuweze kukabiliana na watu wanaoingia maporini kinyume cha sheria.” Alisema Waziri Kigwangala.

Aidha, amesisitiza kuwa askali hao wanatakiwa kuwa waadilifu katika majukumu yao na watakaokiuka agizo hilo itabidi sheria ichukue mkodo wake ili iwe fundisho kwa wengine.

Akitoa taarifa kwa Waziri Kigwangala mkuu wa wilaya ya Ngara Lt. Col. Michael Mntenjele amesema hakuna barabara katika mapori ya hifadhi hali inayopelekea kushindwa kudhibiti ujangili na uvamizi katika mapori hayo.

Waziri Kigwangala amesema kuwa changamoto hiyo iko katika mapori mengi ya akiba hasa katika mikoa ya Kagera, Kigoma na Rukwa na kuongeza kuwa wazo hilo atalifanyiakazi kwani bila kuwepo udhibiti wa waarifu hao mapori ya hifadhi yatavamiwa zaidi.