DC AFANYA ZIARA KIJIJI CHA MUKALINZI KATA YA MUGANZA WILAYANI NGARA

Wakati ilipowekwa: May 14th, 2024

NGARA LEO

Mkuu wa Wilaya ya Ngara Mhe Col. Mathias Julius Kahabi amefanya ziara katika kijiji cha mkalinzi kata ya  Muganza ambapo  katika ziara hiyo ameambatana na baadhi ya Wajumbe wa Kamati ya Usalama Wilaya, Viongozi wa CCM ngazi ya Wilaya wakiongozwa na Mkiti Mhe Vitalis Ndailagije, Mhe Diwani na viongozi  wa Kata ya Muganza   , Wataalam toka Halmashauri wakiongozwa na Mwakilishi wa Mkurugenzi Mtendaji Wilaya Ndg  Enock  Mponzi.

Lengo la ziara hiyo lilikuwa kufuatilia tuhuma dhidi ya Viongozi wa Kijiji hicho hususan Mwenyekiti wa Serikali ya Kijiji Bw Richard Mavogoro kutuhumiwa kugawa ardhi maeneo ya Tingatinga katika Kitongoji cha Musaza.

Mhe.Mkuu wa wilaya  katika kikao alizungumza na Viongozi wa CCM ngazi ya Kata na Kijiji, Wajumbe wa Halmashauri ya Kijiji na baadhi ya wananchi na kutoa maagizo mbalimbali ambapo ameagiza kusimamisha shughuli zote kwenye matingatinga hayo mpaka taratibu zitakapofuatwa, kushirikiana na wananchi pamoja na  Halmashauri ya Kijiji wakati wa kugawa maeneo hayo, kuhakikisha ugawaji unafuata taratibu Kwa waombaji kutuma maombi Kwa kuandika barua.

Aidha Mhe kahabi amesisitiza Serikali ya Kijiji kutogawa maeneo ambayo yana migogoro na kuhakikisha uongozi wa Kata unashirikiana na Serikali ya Kijiji kutambua maeneo yaliyovamiwa.

Mwisho Mhe. Kahabi amewataka wananachi kujiandaa Kwa ajili ya uchaguzi wa Serikali za Mitaa kwa kuchagua Viongozi bora watakaowaletea maendeleo na kupunguza migogoro ya jamii hususan ya ardhi ambapo jamii imekuwa ikikumbana na changamoto hiyo mara kwa mara.

www.ngaradc.go.tz