Ieleweni Katiba ya Chama cha Mapinduzi Msibabaike: Kheri James

Wakati ilipowekwa: July 2nd, 2018

Vijana wilayani Ngara wamekumbushwa kwamba hawana sababu ya kubabaika, kwani wajibuwa wao kwa chama, umefafanuliliwa katika katiba ya chama cha mapinduzi, la msingi ni kuielewa katiba hiyo.

Hayo ni kwa mujibu kwa Mwenyekiti wa Vijana Taifa Ndugu Kheri James, alipokuwa akiongea na wanachama wa chama mapinduzi katika ukumbi wa Halmashauri Juni 29, 2018, wakati wa ziara yake ya siku moja wilayani humo.

Ndugu James amesema lazima wanachama wote waelewe kwamba ili chama kiwe hai lazima kila mwanachama aelewe kwamba chama kimebebwa na viongozi na katiba ya chama, hivyo kila mmoja anawajibika kuitambua, kuielewa na kuiheshimu katiba hiyo.

“Ni katika katiba ndiko mambo yote yanafanyika; huko ndiko vikao vyote vya maamuzi vinatamkwa, na ni katiba pekee inayosaidia kuyajua mamlaka ya wanachama; ya wenyeviti, makatibu na wajibu wa wajumbe.” Alisema Mwenyekiti huyo wa vijana taifa ndugu James.

Katiba, kwa mfano, inafafanua kwamba mwenyekiti anatambua kikao kifanyike au kisifanyike; lakini mjumbe hana mamlaka hayo, bali anapokea maelekezo ya mwenyekiti na katibu wake.

Ndugu James amefafanua kwamba viongozi wanachguliwa na mamlaka yao yapo kwa mujibu wa katiba na kwamba baada ya uchaguzi wanawajibika kusikiliza na kutekeleza majukumu waliotumwa na wananchi.

Aidha, amewaonya wanachama wa Ngara wasikubali kuwepo na katiba mbili katika chama kimoja cha mapinduzi na wala wasikubali kuwepo kwa kundi la watu wachache wanaojifanya kuwa katiba ya chama hicho, bali wawe waumini wa katiba moja.

Matendo ya viongozi, na kauli zao zinakisi misingi ya katiba ya chama, na kwamba ni kwa kufanya hivyo chama cha mapinduzi kitaendelea; amongeza kwamba viongozi wengine wanakwepa kuhudhuria vikao wakati walichaguliwa na kuhapa kuitumikia katiba hiyo.